ଆବୁଧାବିରେ ପ୍ରଥମ ହିନ୍ଦୁ ମନ୍ଦିର; ଉଦଘାଟନ କରିବେ ମୋଦି

ବିଶ୍ୱ ଦେଖିବ ଆବୁଧାବିରେ ପ୍ରଥମ ହିନ୍ଦୁ ମନ୍ଦିର । ୟୁଏଇ ଗସ୍ତରେ ଥିବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଏହି ଭବ୍ୟ ମନ୍ଦିରର ଉଦଘାଟନ କରିବେ । ସ୍ଥାନୀୟ ସମୟ ଅନୁସାରେ ସାଢେ ୪ଟାରୁ ସାଢେ ୭ଟା ଭିତରେ ମନ୍ଦିରର ଉଦଘାଟନ କରିବେ ପ୍ରଧାନମନ୍ତ୍ରୀ । ମଙ୍ଗଳବାର ୟୁଏଇରେ ପହଂଚିବା ପରେ ପ୍ରଧାନମନ୍ତ୍ରୀ ମୋଦୀଙ୍କୁ ସ୍ୱାଗତ କରିଥିଲେ ଏମିରେଟ୍ସର ରାଷ୍ଟ୍ରପତି ଶେଖ ମହମ୍ମଦ ବିନ୍ ଜାୟେଦ ଅଲ୍-ନାହୟାନ୍ । ଆଉ ଏହି ଅବସରରେ ମୋଦୀଙ୍କୁ ଗାର୍ଡ ଅଫ୍ ଅନର ମଧ୍ୟ ଦିଆଯାଇଥିଲା । ଏହା ପରେ ପ୍ରଧାନମନ୍ତ୍ରୀ ‘ଅହଲାନ ମୋଦୀ’ କାର୍ଯ୍ୟକ୍ରମରେ ୬୫ହଜାର ଭାରତୀୟ ସମୁଦାୟଙ୍କ ସମ୍ବୋଧନ କରିଥିଲେ । ପ୍ରଧାନମନ୍ତ୍ରୀ ତାଙ୍କ ଅଭିଭାଷଣରେ କହିଥିଲେ, ଆମ ସମ୍ପର୍କ ହେଉଛି ପ୍ରତିଭା, ନବସୃଜନ ଏବଂ ସଂସ୍କୃତିର ସମ୍ପର୍କ । ଅତୀତରେ ଆମେ ପ୍ରତ୍ୟେକ ଦିଗରେ ଆମ ସମ୍ପର୍କକୁ ପୁନର୍ବାର ଉଜ୍ଜୀବିତ କରିଛୁ । ୟୁଏଇ ହେଉଛି ଭାରତର ତୃତୀୟ ବୃହତମ ବାଣିଜ୍ୟକ ସହଯୋଗୀ । ଆଗାମୀ ଦିନରେ ୟୁଏଇ ସହ ଏହି ସମ୍ପର୍କ ଜାରି ରହିବ ବୋଲି ମୋଦୀ କହିଛନ୍ତି ।