ଗତ କିଛି ଦିନ ତଳେ ଗଣମାଧ୍ୟମରେ ଏମିତି କିଛି ତଥ୍ୟ ସାମନାକୁ ଆସିଥିଲା ଯେ ଧର୍ମେନ୍ଦ୍ର ଓଡିଶା ଲୋକସଭାରୁ ନିର୍ବାଚନ ଲଢିବେ ଯାହାକୁ ନେଇ ଦେଖାଦେଇଛି ରାଜନୈତିକ ଉଷ୍ମତା । ଏଥିପାଇଁ ସେ ତାଙ୍କ ଦଳର ଅନୁମତି ମାଗିଥିଲେ ଯାହାକୁ ନେଇ ରାଜ୍ୟ ବିଜେପି ସଭାପତି ମନମୋହନ ସାମଲ କହିଛନ୍ତି ଯେ ଧର୍ମେନ୍ଦ୍ର କେଉଁଠୁ ଲଢିବେ ସେ ନେଇ କେନ୍ଦ୍ରୀୟ ନେତୃତ୍ୱ ନିଷ୍ପତ୍ତି ନେବେ । ତେବେ ସେପଟେ ଧର୍ମେନ୍ଦ୍ରଙ୍କ ପ୍ରାର୍ଥୀ ହେବା ନେଇ ଢେଙ୍କାନାଳ ବିଜେଡି ସାଂସଦ ମହେଶ ସାହୁ କଟାକ୍ଷ କରି କହିଛନ୍ତି ଯେ ଧର୍ମେନ୍ଦ୍ର ଯେଉଁଠୁ ବି ଲଢିଲେ ବିଜେଡି ଜିତିବ, ଧର୍ମେନ୍ଦ୍ରଙ୍କୁ ବିଜେଡିର ପରୱା ନାହିଁ । ପୁଣି କହିଛନ୍ତି ବାହାଘର ବେଳେ ବାଇଗଣ ରୁଆ,ଧର୍ମେନ୍ଦ୍ର ଢେଙ୍କାନାଳ ଗସ୍ତ କରୁଛନ୍ତି କିନ୍ତୁ ଆମେ ଗ୍ରାଉଣ୍ଡରେ ରହିଛୁ, ତେଣୁ ଆମେ ହିଁ ଜିତିବୁ । ଏହାର ଜବାବରେ ବରିଷ୍ଠ ବିଜେପି ନେତା ରୁଦ୍ର ପାଣି କହିଛନ୍ତି ଶଙ୍ଖ ଭବନ ଓ ବିଜେଡି ତାଙ୍କୁ ଗୁରୁତ୍ୱ ଦେଉନଥିବା ହେତୁ ପାଗଳ ପରି ପ୍ରଳାପ କରୁଛନ୍ତି । ଏବଂ ବିପୁଳ ସଂଖ୍ୟାରେ ଭୋଟ ପାଇ ଧର୍ମେନ୍ଦ୍ର ହିଁ ଜିତିବେ । ସେପଟେ କଂଗ୍ରେସ କହିଛି ଧର୍ମେନ୍ଦ୍ର ପଶ୍ଚିମ ଓଡିଶା ହେଉ କି ପୂର୍ବ ଓଡିଶାରୁ ଲଢନ୍ତୁ ବିଜେଡି ଓ ବିଜେପି ଭିତରେ ବୁଝାମଣା ହୋଇଛି । ବିଜେଡି ଓ ବିଜେପି ଆପୋସ ବୁଝାମଣା କରି କଂଗ୍ରେସ ବିରୁଦ୍ଧରେ ଲଢିବେ ।
ତେବେ କେନ୍ଦ୍ରମନ୍ତ୍ରୀ କେଉଁ ଆସନରୁ ଲଢିବେ ତାହା ଏ ଯାଏଁ ସ୍ପଷ୍ଟ ହୋଇନାହିଁ । ହେଲେ ଏହାକୁ ନେଇ ଆରମ୍ଭ ହୋଇଗଲାଣି ରାଜନୈତିକ ଦଳ ଭିତରେ ଛକାପଞ୍ଝା ।