ଗୁରୁତ୍ୱପୂର୍ଣ୍ଣ ବିଭାଗରେ ଥଇଥାନ ହେବେ କୋରେଇ ବିଧାୟକ !

ବିଜେପିରେ ଆଉ କିଛି ଦିନ ପରେ ଆରମ୍ଭ ହେବ ଦାୟିତ୍ୱ ବଣ୍ଟା କାର୍ଯ୍ୟ । ମାସେରୁ ଅଧିକ ଦିନ ହେବ ବିଜେପି ରାଜ୍ୟରେ ଶାସନ କଲାଣି। କିନ୍ତୁ ଏବେ ବି ଅନେକ ନେତାଙ୍କୁ ଦଳ କିଛି ବି ଦାୟିତ୍ୱ ଦେଇନି । ଯେଉଁମାନଙ୍କ ଭୂମିକା ନିର୍ବାଚନ ସମୟରେ ଅଧିକ ଗୁରୁତ୍ୱବହନ କରିଥିଲା ସେମାନେ ଏବେ ବି ପଛରେ ରହିଛନ୍ତି । ଯେଉଁ କାରଣରୁ ଏବେ ସେମାନଙ୍କୁ ଦଳ କିଛି ଗୁରୁତ୍ୱପୂର୍ଣ୍ଣ ବିଭାଗରେ ସ୍ଥାନିତ କରିବାକୁ ନିଷ୍ପତ୍ତି ନେଉଛି । ଯେଉଁଥିରେ ଅଭିନେତା ଆକାଶ ଦାସ ନାୟକ ମଧ୍ୟ ସାମିଲ ଅଛନ୍ତି । ଚଳିତ ନିର୍ବାଚନ ପୂର୍ବରୁ ଅନ୍ୟ ବିଜେଡି ନେତାଙ୍କ ଭଳି ଆକାଶ ମଧ୍ୟ ବିଜେପି ଶିବିରକୁ ଆସିଥିଲେ । ଏବଂ ଟିକେଟ ମଧ୍ୟ ହାତେଇଥିଲେ । ଏପରିକି ଦୀର୍ଘ ବର୍ଷ ପରେ ଆକାଶଙ୍କ ନେତୃତ୍ୱରେ ଦଳ କୋରେଇରେ ମଧ୍ୟ ପଦ୍ମ ଫୁଟାଇବାରେ ସଫଳତା ହାସଲ କରିଛି । ଯେଉଁ କାରଣ ପାଇଁ ତାଙ୍କୁ ଏବେ ଦଳ ଏକ ବଡ ପଦରେ ସ୍ଥାନିତ କରିବା ନେଇ ଯୋଜନା ଚଳାଇଛି । ତେବେ ତାଙ୍କୁ ବିଧାନସଭାରେ ଦଳର ଉପମୁଖ୍ୟସଚେତକ ପଦ ମିଳିପାରେ ବୋଲି ଆଶଙ୍କା ସୃଷ୍ଟି ହୋଇଛି । କାହିଁକି ନା ଚଳିତ ଥର ଶାସକ ଦଳ ସାମ୍ନାରେ ଏକ ଶକ୍ତିଶାଳୀ ବିରୋଧୀ ଭାବେ ବିଜେଡି ଉଭାନ ହୋଇଛି । ଏବଂ ବିଧାନସଭାରେ ବିରୋଧୀ ଭାବେ ବିଜେଡି ଶାସକ ଦଳକୁ ଆକ୍ଷେପ କରିବାକୁ ଗୋଟିଏ ବି ସୁଯୋଗ ହାତ ଛଡା କରିବନି ବୋଲି ସେଥିରେ ସନ୍ଦେହ ନାହିଁ । ତେଣୁ ଦଳ ଅନୁଭବୀ ନେତାଙ୍କ ସନ୍ଧାନରେ ରହିଥିବା କୁହାଯାଉଛି । ଅନ୍ୟପଟେ ଆକାଶ ବିଜେଡିରେ ଅନେକ ବର୍ଷ କାମ କରିଥିଲେ । ଏବଂ ବିଧାୟକ ମଧ୍ୟ ହୋଇଥିଲେ । ତେଣୁ ତାଙ୍କୁ ବିଜେଡିର ଷ୍ଟ୍ରାଟେଜୀ କଣ ସେ ସମ୍ପର୍କରେ ଧାରଣା ରହିବା ସହ କିପରି ବିଜେଡିକୁ କାଉଣ୍ଟର କରିହେବ ସେ ବିଷୟରେ ମଧ୍ୟ କିଛି ନା କିଛି ଜ୍ଞାନ ରହିଥିବ । ଯାହାକୁ କେନ୍ଦ୍ର କରି ବିଜେପି ଏହାର ଫାଇଦା ନେବ ବୋଲି ସେଥିରେ ସନ୍ଦେହ ନାହିଁ । ତେଣୁ ତାଙ୍କୁ ଏହି ପଦ ମିଳିପାରେ ବୋଲି ଆଶଙ୍କା କରାଯାଉଛି । ତେବେ ଦେଖାଯାଉ ଏହି ଚର୍ଚ୍ଚାରେ କେବେ ପୂଣ୍ଣଚ୍ଛେଦ ପଡୁଛି ଏବଂ ଆକାଶଙ୍କୁ ଉପମୁଖ୍ୟସଚେତକ ପଦ ମିଳୁଛି ନା ନାହିଁ ତାହା ଦେଖିବାର କଥା ।