ଚେଇଁ ଶୋଇଛି ବନ ବିଭାଗ…ଏପେଟ ଚାଲିଛି କେନ୍ଦୁ କାଠ ଚୋରାଚାଲାଣ

ବୌଦ୍ଧ ଜିଲ୍ଲା କଣ୍ଟାମାଳ ରେଞ୍ଜ ଘଣ୍ଟା ପଡ଼ା ସେକ୍ସନ ଅନ୍ତର୍ଗତ ଲଣ୍ଡା ବାହାଲ ଗ୍ରାମ ନିକଟରୁ ବନ ବିଭାଗ କର୍ମଚାରୀ ମାନେ ବିପୁଳ ପରିମାଣର କେନ୍ଦୁ କାଠ ଜବତ କରିଥିଲେ । ହେଲେ କେତେ ପରିମାଣର କେନ୍ଦୁ କାଠ ଜବତ ହୋଇଛି ଏବଂ କାହାକୁ ଗିରଫ କରାଯାଇଛି ତାହା ଆଜକୁ ଦୁଇ ଦିନ ବିତି ଯାଇଥିଲେ ସୁଦ୍ଧା ବିଭାଗର ଅଧିକାରୀ ତଦନ୍ତ ଚାଲିଥିବା କହି କୌଣସି ତଥ୍ୟ ଦେଉ ନାହାନ୍ତି । ଯାହା ଫଜରେ ବନ ବିଭାଗର କାର‌୍ୟ୍ୟଦକ୍ଷତା ଓ ସ୍ବଚ୍ଛତା ନେଇ ଅନେକ ସମାଲୋଚନା ଆରମ୍ଭ ହୋଇଥିବା ବେଳେ ନାନା ପ୍ରଶ୍ନ ଉଙ୍କି ମାରୁଛି । ବନ ବିଭାଗର ସ୍ବଚ୍ଛତା ଓ କାର‌୍ୟ୍ୟଦକ୍ଷତା ଉପରେ ଅଙ୍ଗୁଳି ନିର୍ଦ୍ଦେଶ କଲେଣି ଲୋକେ । କଣ୍ଟାମାଳ ବନ ବିଭାଗ ପାଇଁ କାଠ ଚୋରା ଚାଲାଣ ନୂଆ କଥା ନୁହେଁ । ପୂର୍ବରୁ ଏଭଳି କାଠ ଚୋରା ଚାଲାଣର ଅନେକ ନଜିର ରହିଛି । ଗତ କିଛି ମାସ ପୂର୍ବେ ବନ ବିଭାଗ ଏକ କାଠ ଚୋରା ଚାଲାଣ ଘଟଣାରେ ଟ୍ରାକ୍ଟର, ଏକ ହାଇଡ୍ରା ଆଦି ଜବତ କରିଥିବା ବେଳେ ପରବର୍ତ୍ତୀ ମୁହୂର୍ତ୍ତରେ କାଠ ମାଫିଆ ସହ ଲକ୍ଷାଧିକ ଟଙ୍କାର ଡ଼ିଲ କରି ଛାଡ଼ି ଦେଇଥିବା ନଜିର ରହିଛି । ଅନ୍ୟପଟେ ଏତେ ପରିମାଣର କାଠ ସବୁ ଜବତ୍ ହୋଇଥିବା ବେଳେ ସଂପୃକ୍ତ ଅଞ୍ଚଳର ବନପାଳ , ବନରକ୍ଷୀ ଓ ବନ କର୍ମଚାରୀ କଣ କରୁଥିଲେ ବୋଲି ଲୋକେ ପ୍ରଶ୍ନ କରିଛନ୍ତି ବନ ବିଭାଗର କାର‌୍ୟ୍ୟଦକ୍ଷତା ଓ ସ୍ବଚ୍ଛତା ଉପରେ ପ୍ରଶ୍ନବାଚୀ ସୃଷ୍ଟି ହୋଇଥିବା ବେଳେ ବିଭାଗର କାଠ ଚାଲାଣ ପ୍ରୀତି ସ୍ପଷ୍ଟ ବାରି ହେଉଛି । ଘଟଣା ସମ୍ପର୍କରେ କଣ୍ଟାମାଳ ରେଞ୍ଜରଙ୍କୁ ପଚାରିବାରୁ ଛତିଶଗଡ଼ ର କାଗଜପତ୍ର ଦେଖାଉ ଥିବାରୁ ତଦନ୍ତ ବିଳମ୍ବ ହେଉଥିବା କହୁଥିବା ବେଳେ, ବୌଦ୍ଧ ଡି ଏଫ୍ ଓ ଘଟଣା ସମ୍ପର୍କରେ କିଛି ଜାଣି ନାହାନ୍ତି ବୋଲି କହିଥିଲେ । ତେବେ ଜଙ୍ଗଲକୁ ବନ ବିଭାଗ ସୁରକ୍ଷା ଦେବା ପରିବର୍ତ୍ତେ ଧ୍ଵଂସ କରିବାରେ ପ୍ରମୁଖ ଭୂମିକା ଥିବାରୁ ଏହି ଘଟଣାର ଉଚ୍ଚସ୍ତରୀୟ ତଦନ୍ତ ହୋଇ ଦୋଷୀ ଅଧିକାରୀଙ୍କ ବିରୁଦ୍ଧରେ ଦୃଢ କାର‌୍ୟ୍ୟାନୁଷ୍ଠାନ ଗ୍ରହଣ କରିବାକୁ ସାଧାରଣରେ ଦାବି ହେଉଛି ।