By କାହିଁକି ନବୀନଙ୍କ ବୋଲ ମାନୁ ନାହାନ୍ତି ନେତାଙ୍କ ଠାରୁ ଯେ କର୍ମୀଙ୍କ ପର୍ଯ୍ୟନ୍ତ । ବେଳ ଥାଉ ଥାଉ ଦଳକୁ ଆୟତ୍ତ କରିବା ପାଇଁ ଅଣ୍ଟା ଭିଡିଛନ୍ତି ବିଜେଡି ସୁପ୍ରିମୋ ନବୀନ ପଟ୍ଟନାୟକ । କିନ୍ତୁ କଳି କମିବା ବଦଳରେ ବଢିବାରେ ଲାଗିଛି । ଦାଣ୍ଡରେ ପଡି ହାଟରେ ଗଡୁଛି ବିଜେଡିର ଅନ୍ତଃକନ୍ଦଳ । କେବଳ ଭୁବନେଶ୍ୱର ଶଙ୍ଖ ଭବନ ନୁହେଁ ବରଂ ପାରାଦୀପ ଠାରୁ ଆରମ୍ଭ କରି ଭଦ୍ରକ ପର୍ଯ୍ୟନ୍ତ ବିଜେଡି ଗଡରେ ବୃଦ୍ଧି ପାଉଛି ଅସନ୍ତୋଷ । ଦଳକୁ ଆୟତ୍ତ କରିବାକୁ ଯାଇ ଗୋଟେ ପରେ ଗୋଟେ ଚକମା ଖାଉଛନ୍ତି ନବୀନ । ନିରବଦ୍ରଷ୍ଟା ସାଜିଥିବା ନବୀନଙ୍କ ନିଦ ଭାଙ୍ଗିଛି ସତ କିନ୍ତୁ କ୍ଷମତା ଖସିବା ପରେ ନବୀନଙ୍କ ନାଲି ଆଖିକୁ କାହାର ଖାତିର ନାହିଁ । ତୃଣମୂଳ ସ୍ତରରୁ ନିଜ ଦଳୀୟ କର୍ମୀଙ୍କୁ ଏକ ମନ ଓ ଏକ ପ୍ରାଣ ନେଇ କାମ କରିବାକୁ ଚେଷ୍ଟା କରୁଥିଲେ ସୁଦ୍ଧା ବିଜେଡିରେ ସବୁ କିଛି ଅଲ ଇଜ ନଟ ୱେଲ । ଏକଦା ଶୃଙ୍ଖଳିତ ଦଳ ଭାବେ ପରିଗଣିତ ହେଉଥିବା ପ୍ରମୁଖ ଆଞ୍ଚଳିକ ଦଳ ବିଜୁ ଜନତା ଦଳ ଏବେ ବିଶୃଙ୍ଖଳାର ଚରମ ସୀମାର ପହଞ୍ଚିଛି । ନିର୍ବାଚନ ହାରିବା ପରେ ଔଷଧ ବିକଳରେ ତାଟିଆ କାମୁଡିବା ରଣନୀତି କରୁଛନ୍ତି ନବୀନ । ତେବେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଲା ବିଜେଡିର ଦୁଇ ବାହୁବଳୀ କର୍ପୋରେଟରଙ୍କୁ ନେଇ ଯେଉଁ ଅସନ୍ତୋଷ ଲାଗି ରହିଛି ତାହା ଆଗକୁ ବିଜେଡିର ପୌର ନିର୍ବାଚନ ଉପରେ ପ୍ରଭାବ ପକାଇପାରେ । ସେଥିପାଇଁ ଦଳର ସମସ୍ତ କମିଟିକୁ ଭାଙ୍ଗି ନୂଆ କମିଟି ଗଠନ କରିଛନ୍ତି । ବରିଷ୍ଠ ମାନଙ୍କୁ ଆଗକୁ ଆଣୁଛନ୍ତି ନିତି ଶଙ୍ଖଭବନରେ କବାଟ କିଳି ମିଟିଂ କରୁଛନ୍ତି ହେଲେ ଶେଷରେ ଫଳାଫଳ ଶୂନ । ଅନ୍ତଃକନ୍ଦଳ କମିବା ପରିବର୍ତ୍ତେ ବଢିବାରେ ଲାଗିଛି । ତେବେ ଦେଖିବାକୁ ଅପେକ୍ଷା ଆଗକୁ ଶଙ୍ଖ ଭବନରେ ନବୀନଙ୍କୁ କେଉଁ କେଉଁ ଝଡର ସାମ୍ନା କରିବାକୁ ପଡୁଛି ।
