ରାଜସ୍ଥାନ ବିଧାନସଭାରେ କଂଗ୍ରେସର ୫୦ଲକ୍ଷ ଟଙ୍କା ସ୍ୱାସ୍ଥ୍ୟବୀମା ସହ ୫ଲକ୍ଷ ଟଙ୍କା ଋଣ

ରାଜସ୍ଥାନରେ ହେବାକୁ ଯାଉଥିବା ବିଧାନସଭା ନିର୍ବାଚନ ପୂର୍ବରୁ କଂଗ୍ରେସ ତରଫରୁ ଘୋଷଣାପତ୍ର ଜାରି କରାଯାଇଛି । ରାଜସ୍ଥାନରେ ନଭେମ୍ବର ୨୩ ତାରିଖକୁ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି । କଂଗ୍ରେସ ରାଷ୍ଟ୍ରୀୟ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ. ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ୍, କଂଗ୍ରେସ ରାଜସ୍ଥାନ ପ୍ରଭାରୀ ସୁଖଜିନ୍ଦର ସିଂ ରନ୍ଧବା, କଂଗ୍ରେସ ରାଜ୍ୟ ଅଧ୍ୟକ୍ଷ ଗୋବିନ୍ଦ ସିଂ ଡୋଟାସରାଙ୍କ ଉପସ୍ଥିତିରେ ଏହି ଘୋଷଣାପତ୍ର ଜାରି କରାଯାଇଛି । ପୁଣି କ୍ଷମତା ହାତେଇବାକୁ ଚେଷ୍ଟା କରୁଥିବା କଂଗ୍ରେସ ରାଜ୍ୟବାସୀଙ୍କୁ ଅନେକ ଲୋଭନୀୟ ପ୍ରତିଶ୍ରୁତି ଦେଇଛି ।
କ୍ଷମତାକୁ ଆସିଲେ ରାଜ୍ୟରେ ଜାତିଭିତ୍ତିକ ଜନଗଣନା , ସ୍ୱାସ୍ଥ୍ୟବୀମା ୨୫ ଲକ୍ଷ ଟଙ୍କାରୁ ୫୦ ଲକ୍ଷ ଟଙ୍କାକୁ ବୃଦ୍ଧି, ବ୍ୟବସାୟ ପାଇଁ ବିନା ସୁଧରେ ୫ ଲକ୍ଷ ଟଙ୍କା ପର‌୍ୟ୍ୟନ୍ତ ଋଣ, ଖନନ ଶ୍ରମିକଙ୍କୁ ବିନା ସୁଧରେ ଋଣ, ରାଜ୍ୟ ପ୍ରଶାସନର ନୂଆ ମଡେଲ ପ୍ରସ୍ତୁତ, ପଞ୍ଚାୟତ ସ୍ତରରେ ନୂତନ ନିଯୁକ୍ତି, ପଞ୍ଚାୟତ ସମିତି ସ୍ତରରେ ନୂତନ ସେବା କ୍ୟାଡର ଗଠନ ପାଇଁ ପ୍ରତିଶ୍ରୁତି, କୃଷକଙ୍କୁ ୨ ପ୍ରତିଶତ ସୁଧରେ ଋଣ ପ୍ରଦାନ, ପ୍ରତିବର୍ଷ ପରିବାରର ମହିଳା ମୁଖ୍ୟଙ୍କୁ ୧୦ ହଜାର ଟଙ୍କା ସହାୟତା, ପ୍ରତି ପରିବାରର ୨ଟି ପଶୁଙ୍କୁ ବୀମାଭୂକ୍ତ କରିବା, କିଲୋ ପ୍ରତି ୨ଟଙ୍କାରେ ଗୋବର କିଣାଯିବ, କଲେଜରେ ପଢୁଥିବା ଛାତ୍ରୀମାନଙ୍କୁ ମାଗଣା ଲାପଟପ୍ ।