By 
ଗତ କିଛି ଦିନ ତଳେ ସିକ୍କିମରେ ପ୍ରଳୟଙ୍କରୀ ବନ୍ୟାରେ ଭାସିଯାଇଥିଲେ ଅନେକ ବ୍ୟକ୍ତି । ଦେଶବାସୀଙ୍କୁ ଅସ୍ତର କରୁଛି ସିକ୍କିମ ବନ୍ୟା । ତେବେ ଉତ୍ତର ସିକ୍କିମରେ ବାଦଲଫଟା ବର୍ଷାରେ ସୃଷ୍ଟି ହୋଇଥିବା ବନ୍ୟା ପ୍ରଭାବରେ ୨୭ ଜଣଙ୍କର ମୃତ୍ୟୁ ଘଟିବା ସହିତ ୧୪୦ରୁ ଅଧିକ ନିଖୋଜ ଅଛନ୍ତି । ବନ୍ୟାରେ ଭାସିଯାଇଥିବା ସେନା ଯବାନଙ୍କ ମଧ୍ୟରୁ ଏଯାଏଁ ମାତ୍ର ୪ଜଣଙ୍କର ମୃତଦେହ ମିଳିଛି । ଏବେବି ଉଦ୍ଧାର କାର୍ୟ୍ୟ ଜାରି ରହିଛି । ଶୁକ୍ରବାର ପଡୋଶୀ ରାଜ୍ୟ ପଶ୍ଚିମବଙ୍ଗ ଓ କୁଚ୍ଛ ବିହାରରୁ ୬ଟି ଶବ ମିଳିଛି । ଏହାସହ ମୃତ୍ୟୁ ସଂଖ୍ୟା ୨୭ରେ ପହଞ୍ଚିଛି । ସିକ୍କିମର ନାଚମି ଓ ପାକୟୋଙ୍ଗ ଜିଲ୍ଲାରୁ ମିଳିଥିବା ତାଜା ଖବର ମୁତାବକ, ନିଖୋଜ ବ୍ୟକ୍ତିଙ୍କ ତାଲିକା ଗୋଟିଏ ଦିନର ବୃଦ୍ଧିପାଇ ୧୪୨ରେ ପହଞ୍ଚିଛି । ଗୁରୁବାର ନିଖୋଜଙ୍କ ସଂଖ୍ୟା ୭୮ଥିବାବେଳେ ଏଥିରେ ବୃଦ୍ଧି ହୋଇଥିବ ଜଣାପଡିଛି ।
ସିକ୍କିମ ସରକାରଙ୍କ କହିବା ମୁତାବକ, ବାଦଲଫଟା ବର୍ଷା ହେବାରୁ ବିଶାଳ ହିମଖଣ୍ଡ ସବୁ ଖସିଆସି ହ୍ରଦରେ ମରିଥିବାରୁ ବନ୍ୟା ଜଳ ହଠାତ୍ ଅସମ୍ଭବ ଭାବେ ବଢିଯାଇ କୂଳ ଲଂଘନ କରିଥିଲା । ଏଥିରେ ଅନେକ ଘର ଦ୍ୱାର ଭାସିଯାଇଛି । ବନ୍ୟାରେ ପ୍ରାଣ ହରାଇଥିବା ବ୍ୟକ୍ତିଙ୍କ ପରିବାରକୁ ୪ ଲକ୍ଷ ଟଙ୍କା ସହାୟତା ଘୋଷଣା କରିଛନ୍ତି ସିକ୍କିମ ସରକାର । ଏହାସହ କ୍ଷତିଗ୍ରସ୍ତଙ୍କୁ ତୁରନ୍ତ ୨୦୦୦ ଟଙ୍କା ଲେଖାଏଁ ଆର୍ଥିକ ସହାୟତା ଦିଆଯିବା ସହ ସେମାନଙ୍କୁ ସୁରକ୍ଷିତ ସ୍ଥାନରେ ଶିବରରେ ରଖାଯାଇଛି । ଏହି ପ୍ରାକୃତିକ ବିପର୍ୟ୍ୟୟରେ ପାଖାପାଖି ୨୫୦୦ ଲୋକ ବାସହୀନ ହୋଇଛନ୍ତି ।
