By ପୁଣିଥରେ ରାଷ୍ଟ୍ରପତି ନିର୍ବାଚନ ଲଢିବେ ରୁଷ୍ ରାଷ୍ଟ୍ରପତି ଭ୍ଲାଦିମିର ପୁଟିନ । କିନ୍ତୁ ଏଥର ଦଳରୁ ନୁହେଁ ବରଂ ସ୍ୱାଧୀନ ଭାବରେ ମୈଦାନକୁ ଓହ୍ଲାଇବେ ପୁଟିନ । ପୁଟିନଙ୍କ ଦଳ କିନ୍ତୁ ତାଙ୍କୁ ନିର୍ବାଚନରେ ସମର୍ଥନ କରିବ । ଦୁଇ ଜଣ ଦଳୀୟ ସାଂସଦଙ୍କ ବୟାନକୁ ଆଧାର କରି ଆରଆଇଏ ନ୍ୟୁଜ ଏଜେନ୍ସି ଏହି ଖବର ପ୍ରକାଶ କରିଛି ।
ଦୀର୍ଘ ୨ ଦଶନ୍ଧିରୁ ଅଧିକ ସମୟ ହେଲା ପୁଟିନ ରୁଷର ଶାସନ ଗାଦିରେ ବସିଛନ୍ତି। ସେ ପ୍ରଥମେ ଦେଶର ପ୍ରଧାନମନ୍ତ୍ରୀ ହୋଇଥିଲେ। ଏହାପରେ ସେ ଦୀର୍ଘ ବର୍ଷ ହେଲାଣି ରାଷ୍ଟ୍ରପତି ଭାବେ କାର୍ୟ୍ୟ କରୁଛନ୍ତି। ଏବେ ମାର୍ଚ୍ଚ ମାସରେ ହେବାକୁ ଥିବା ନିର୍ବାଚନରେ ସେ ପୁଣିଥରେ ରାଷ୍ଟ୍ରପତି ନିର୍ବାଚନ ଲଢ଼ିବେ। ରାଷ୍ଟ୍ରପତି ହେଲେ ସେ ଆଉ ୬ ବର୍ଷ ଶାସନ ଗାଦିରେ ରହିବେ। ପୁଟିନ କ୍ଷମତାସୀନ ୟୁନାଇଟେଡ ରୁଷ (ୟୁଆର)ର ପ୍ରାର୍ଥୀ ହେବେ ନାହିଁ। କିନ୍ତୁ ୟୁଆର ତାଙ୍କୁ ନିର୍ବାଚନରେ ପୂରା ସମର୍ଥନ କରିବ। ସେ ସ୍ୱାଧୀନ ଭାବେ ନିର୍ବାଚନ ଲଢ଼ିଲେ ମଧ୍ୟ ବିଜୟୀ ହେବାର ଯଥେଷ୍ଟ ସମ୍ଭାବନା ରହିଛି।
ଜଷ୍ଟ ରୁଷ ପାର୍ଟିର ସେରଗେଇ ମିରୋନୋଭ କହିଛନ୍ତି, ପୁଟିନ ସ୍ୱାଧୀନ ପ୍ରାର୍ଥୀ ଭାବେ ନିର୍ବାଚନ ଲଢ଼ିବେ ସତ, କିନ୍ତୁ ସେ ବିଜୟୀ ହେବେ। କାରଣ ଆମେ ତାଙ୍କ ସମର୍ଥନରେ ଦସ୍ତଖତ ଅଭିଯାନ ଆରମ୍ଭ କରିବୁ।
ପୁଟିନଙ୍କୁ ସମର୍ଥନ କରୁଥିବା ଲୋକଙ୍କ କହିବା କଥା ଯେ ସେ ଜାତୀୟ ସ୍ୱାର୍ଥକୁ ଅଗ୍ରାଧିକାର ଦେବା ସହ ଦେଶର ସୁରକ୍ଷା କରିଛନ୍ତି। ସୋଭିଏତ ଭୁଶୁଡ଼ିବା ପରେ ସୃଷ୍ଟି ହୋଇଥିବା କ୍ଷତଚିହ୍ନକୁ ସେ ଭରଣ କରିଛନ୍ତି। ୟୁକ୍ରେନ ସହ ରୁଷ କରୁଥିବା ଯୁଦ୍ଧକୁ ଅନେକ ଲୋକ ସମର୍ଥନ କରିବା ପୁଟିନଙ୍କ ଲୋକପ୍ରିୟତାକୁ ବଢ଼ାଇ ଦେଇଛି।
