ଉପରାଷ୍ଟ୍ରପତିଙ୍କ ମିମିକ୍ରି କରିବା ପଡିଲା ମହଙ୍ଗା; ଥାନାରେ ରୁଜୁ ହେଲା ମାମଲା

ବିରୋଧୀ ସାଂସଦଙ୍କ ନିଲମ୍ବନ ପରେ ସଂସଦ ପରିସରରେ ଉପରାଷ୍ଟ୍ରପତି ଜଗଦୀପ ଧନଖଡେଙ୍କ ମିମିକ୍ରି ବା ନକଲ କରିଥିବା ଟିଏମ୍ସି ସାଂସଦ କଲ୍ୟାଣ ବାନାର୍ଜୀ ନାଁରେ ରୁଜୁ ହୋଇଛି ମାମଲା। ତାଙ୍କ ବିରୋଧରେ ଦିଲ୍ଲୀ ପୁଲିସ ଏହି ମାମଲା ରୁଜୁ କରିଛି।

ଅଭିଷେକ ଗୌତମ ନାମକ ଜଣେ ଓକିଲ ଡିଫେନ୍ସ କଲୋନୀ ପୁଲିସ ଷ୍ଟେସନରେ ଅଭିଯୋଗ କରିଛନ୍ତି, ଯାହାକୁ ପୋଲିସ ଗ୍ରହଣ କରିଛି। ଏହି ଅଭିଯୋଗ ଆଧାରରେ ପୁଲିସ ତଦନ୍ତ ମଧ୍ୟ ଆରମ୍ଭ ହୋଇଛି। ଉପରାଷ୍ଟ୍ରପତିଙ୍କୁ ଅପମାନିତ କରାଯାଇଥିବା ଓକିଲ ଅଭିଷେକ ତାଙ୍କ ଅଭିଯୋଗରେ କହିଛନ୍ତି। ଏହି ତୃଣମୂଳ କଂଗ୍ରେସ ସାଂସଦଙ୍କ ବିରୋଧରେ ସେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରିଛନ୍ତି।

ନିଲମ୍ବିତ ସାଂସଦମାନେ ନୂତନ ସଂସଦ ଭବନର ‘ମାକର ଦ୍ୱାର’ରେ ବିକ୍ଷୋଭ ପ୍ରଦର୍ଶନ କରିଥିଲେ। ଏହି ସମୟରେ ତୃଣମୂଳ କଂଗ୍ରେସ ସାଂସଦ କଲ୍ୟାଣ ବାନାର୍ଜୀ ରାଜ୍ୟସଭାର ପ୍ରକ୍ରିୟା ଚାଲିଥିବାବେଳେ ଉପରାଷ୍ଟ୍ରପତି ଜଗଦୀପ ଧନଖଡ଼େଙ୍କ କଥା କହିବା ଶୈଳୀକୁ ନକଲ କରିଥିଲେ। ଏହି ସମୟରେ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀ ମଧ୍ୟ ଘଟଣାସ୍ଥଳରେ ଠିଆ ହୋଇ ମୋବାଇଲରେ ବାନାର୍ଜୀଙ୍କ ମିମିକ୍ରି କରୁଥିବା ବେଳର ଭିଡିଓ ତିଆରି କରୁଥିବା ଦେଖିବାକୁ ମିଳିଥିଲା। ପରେ ଏହି ଭିଡିଓ ସୋଶାଲ ମିଡିଆରେ ଭାଇରାଲ ହୋଇଥିଲା।