ଖୋଲା ମଞ୍ଚରେ ବବିଙ୍କ ଅଙ୍କ ବିଗାଡିଦେଲେ ମୋହନ !

ନିର୍ବାଚନ ସରିବା ପରେ ରାଜ୍ୟରେ ଆରମ୍ଭ ହୋଇଛି ଅସଲ ରାଜନୀତି । ଲଗାମ ଛଡା ହୋଇପଡିଥିବା ଦଳକୁ ନିୟନ୍ତ୍ରଣ କରୁଛନ୍ତି ବିଜେଡି ସୁପ୍ରିମୋ । ସେପଟେ ସଦସ୍ୟତା ସଭିଯାନ ଆରମ୍ଭ କରି ଗାଁ ଗାଁ ବୁଲି ଭାଷଣ ମାରିଲେଣି ମୋହନ । ସଦସ୍ୟତା ଅଭିଯାନ କରୁଛନ୍ତି ପୂର୍ବର ନବୀନ ସରକାରଙ୍କ ଉପରେ ବର୍ଷୁଛନ୍ତି । ରବିବାର ଯାଜପୁର ବଡଚଣାରେ ଆୟୋଜିତ ହୋଇଥିଲା ବିଜେପିର ସଦସ୍ୟତା ଅଭିଯାନ । ଯେଉଁଥିରେ ମୁଖ୍ୟମନ୍ତ୍ରୀ ନିଜ ଭାଷଣ ମାଧ୍ୟମରେ ଭରା ସଭାରେ ଏକଦା ବିଜେଡିର ଦ୍ୱିତୀୟ କ୍ଷମତା କେନ୍ଦ୍ର ବୋଲାଉଥିବା ପ୍ରଣବ ପ୍ରକାଶ ଦାସଙ୍କ ଗୁମର ଖୋଲିଛନ୍ତି । ବବିଙ୍କ ଅଭେଦ୍ୟ ଦୁର୍ଗରେ ଏଣ୍ଟ୍ରି କରି ତାଙ୍କୁ କଡା ଭାଷାରେ ସମାଲୋଚନା କରିଛନ୍ତି । ଗୋଟିଏ ପଟେ ନିଜ ଦଳରେ ବବିଙ୍କ ପକ୍ଷ ଛେଦନ କରିବାରେ ଲାଗିଛନ୍ତି ସୁପ୍ରିମୋ ନବୀନ ପଟ୍ଟନାୟକ । ଆଉ ଏପଟେ ଭରା ସଭାରେ ବବିଙ୍କ ଗଡରେ ତାଙ୍କର ସବୁ ଗୁମରକୁ ପଦାରେ ପକାଇ ଦେଇଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ ।