By ପୁଣି କ୍ଷମତାକୁ ଫେରିବେ କି ବିଜେଡି ନେତା ପ୍ରଣବ ପ୍ରକାଶ ଦାସ ? ପୁଣି ଯାଜପୁର ଆସନର ଶାସନର ଚାବି କାଠି ଧରିବେ କି ବବି ? ଏଭଳି କିଛି ପ୍ରଶ୍ନ ଗତ କିଛି ଦିନ ଧରି ସବୁଆଡେ ଚର୍ଚ୍ଚାର ବିଷୟ ପାଲଟିଛି । ଯାଜପୁର ବିଧାୟିକାଙ୍କ ଇସ୍ତଫା ପରେ ଉପନିର୍ବାଚନ ହେବ ଏବଂ ବବି ପୁଣି ପ୍ରାର୍ଥୀ ହୋଇ ଜିତିବେ ବୋଲି ଆଲୋଚନା ଚାଲିଛି । ଏପରିକି ବବିଙ୍କ ସକ୍ରିୟତା ମଧ୍ୟ ଏଦିଗକୁ ଇସାରା ଦେଉଛି । ଆଉ ଏସବୁ ଭିତରେ ଖୋଦ ବିଜେଡି ନେତ୍ରୀ ତଥା ଯାଜପୁର ସଦର ବିଧାୟିକା ସୁଜାତା ସାହୁ ମୁହଁ ଖୋଲିଛନ୍ତି । ଏବଂ ଏଭଳି ଚର୍ଚ୍ଚାକୁ ଖଣ୍ଡନ କରିଛନ୍ତି । କହିଛନ୍ତି, ଯାହା ଆଲୋଚନା ଓ ଚର୍ଚ୍ଚା ହେଉଛି ସବୁ ଗଣମାଧ୍ୟମରେ। ହେଲେ ଇସ୍ତଫା ଓ ଉପନିର୍ବାଚନ ନେଇ ମୁଁ କିଛି କହିନି କି ମୋ’ ନେତା କହିନାହାନ୍ତି ବୋଲି ସୁଜାତା କହିଛନ୍ତି।
ଗଣମାଧ୍ୟମକୁ ସୂଚନା ଦେଇ ବିଜେଡି ବିଧାୟକ ସୁଜାତା ସାହୁ କହିଛନ୍ତି, ମୋର ଇସ୍ତଫା ଦେବାର ନାହିଁ କି ପ୍ରଣବ ପ୍ରକାଶ ଦାସ ଉପନିର୍ବାଚନ ଲଢ଼ିବାର ନାହିଁ। କାରଣ ସେ କ୍ଷମତାଲୋଭୀ ନୁହଁନ୍ତି। ଉପନିର୍ବାଚନ ନେଇ ଯେତେବେଳେ ଗଣମାଧ୍ୟମରେ ଆଲୋଚନା ହେଉଥିଲା, ସେତେବେଳେ ମୁଁ ବବି ଦାସଙ୍କ ପାଖକୁ ଯାଇଥିଲି। ସେତେବେଳେ ସେ କହିଥିଲେ, ମୋର କ’ଣ ବିଧାୟକ ହେବାର ଆବଶ୍ୟକତା ରହିଛି? ମୁଁ କ୍ଷମତାଲୋଭୀ ନୁହେଁ ବୋଲି ପ୍ରଣବ କହିଥିବା ସୁଜାତା ପ୍ରକାଶ କରିଛନ୍ତି।
