By ଭୁବନେଶ୍ବର:
ଏପ୍ରିଲରୁ ଜୁନ୍ ପର୍ଯ୍ୟନ୍ତ ଝଟପଟ ହେବ ସାରା ଓଡିଶା | ମାର୍ଚ୍ଚ ମାସରେ ପଶ୍ଚିମା ଝଡ଼ର ପ୍ରଭାବରେ ଅଧା ଦିନ ବର୍ଷ ଓ ଥଣ୍ଡା ପାଗରେ କଟିଯାଇଥିବାବେଳେ ଏବେ ଆସିଲା ଖରା, ଗରମ ଓ ଗୁଳୁଗୁଳିର ପାଗ | ଏଥର ଖରାରେ ଝଟପଟ ହେବ ସାରା ଓଡିଶା | ଏପ୍ରିଲ, ମେ’ ଓ ଜୁନ୍ ମାସରେ ଓଡ଼ିଶାବାସୀ ପ୍ରଚଣ୍ଡ ରୌଦ୍ରତାପ ଓ ଗରମରେ ଝଟପଟ ହେବେ |
କେବଳ ଓଡ଼ିଶା ନୁହେଁ, ଭାରତର ଅଧିକାଂଶ ସ୍ଥାନରେ ଏହି ଅବସ୍ଥା ଦେଖାଯିବ। ଏନେଇ ଆଜି ଭାରତୀୟ ପାଣିପାଗ ବିଭାଗ ପକ୍ଷରୁ ଆସନ୍ତା ୩ ମାସର ତାପମାତ୍ରା ଆଉଟ୍ଲୁକ୍ ଜାରି କରି ଏହି ସୂଚନା ଦିଆଯାଇଛି। ଏଥିସହ ଏଥିରେ କୁହାଯାଇଛି ଯେ ଏପ୍ରିଲରୁ ଜୁନ୍ ଭିତରେ ରାଜ୍ୟରେ ବର୍ଷା କମ୍ ଓ ଗ୍ରୀଷ୍ମ ପ୍ରବାହ ଦିନଗୁଡ଼ିକ ସଂଖ୍ୟା ଅଧିକ ରହିବ।
ଏଥିସହ ଓଡ଼ିଶା ସମେତ ଉତ୍ତରପୂର୍ବ, ପୂର୍ବ ଓ ପଶ୍ଚିମ ଉପକୂଳ ଭାରତର ରାଜ୍ୟଗୁଡ଼ିକରେ ଏହି ୩ ମାସରେ ବର୍ଷା ସ୍ବାଭାବିକଠାରୁ କମ୍ ରହିବ। ଫଳରେ ତାତି ଆହୁରି ଅଧିକ ଅନୁଭୂତ ହେବ। ଦେଶର ଅବଶିଷ୍ଟ ଅଞ୍ଚଳରେ ସ୍ବାଭାବିକଠାରୁ ଅଧିକ ବର୍ଷା ବା କାଳବୈଶାଖୀ ଜନିତ ବର୍ଷା ହୋଇପାରେ ବୋଲି ପାଣିପାଗ ବିଭାଗ ପକ୍ଷରୁ ଆକଳନ କରାଯାଇଛି।
